يا محلى الراحة بعد التعب

السلام عليكم
كيف حالكم زوار مدونتي الكرام

أذكر من يوم و كنا اطفال و نحن ننتظر الاجازة

سواء كانت إجازة الاسبوع

أو عطلة نهاية السنة

يوم خلصنا المدرسة نتمنى يي اليوم الي نخلص من الجامعة و نتخرج عشان نرتاح
يوم نخلص الجامعة ... و هني يبدا موضوعنا

نظن ان نحن خلاص وصلنا للمطلوب
و نتمتع باوقات الفراغ التي لا تنتهي
يوم ... يومين
اسبوع ... اسبوعين
شهر ... شهرين

بعدين ندور على شي يشغلنا
على شي نسويه
اي شي ممكن
نبدا نحس بالملل

الحمدلله ان خدامتنا شردت لوول
الشي الي خلاني اساعد امي و اتعلم منها كيف استوي على قولتهم
ست بيت

و بعد الشغل و الكراف
ادخل غرفتي و اسوي الشي الي احبه
و غالبا ما يكون تصفح الانترنت

قمت احس ان وناستي و راحتي لها طعم
صدقوني الراحة الدايمة تفقد الانسان طعم الحياة
التعب ساعات يكون حلو
لانه ملح الحياة

و الاكل بدون ملح ما ينبلع
اليوم كان يوم متعب
خاصة ان ضيوف بيونا هالاسبوع
فورانا اشغال وايدة
بس بصراحة كمية السعادة الي احس فيها بعد الشغل حلوة
فعلا مافي احلى من الراحة عقب التعب

و بس
هاي سالفتي لليوم
و مع السلامة